Wednesday, March 18, 2009

唔係講窩輪

好多事情都好似玩窩輪咁,買輪梗係想博雙糧花紅退休金(做對沖?大戶芬佬投行銀行就話遮,散戶庶民梗係博老命博大霧架啦)。

誰不知有時(查實好多時)睇錯市,就逼住hold,一路 hold,個價就一路跌,覺得一日未放,一日都未算蝕。若果唔 hold 住,就一定唔能夠翻本,到有機會博到翻本就自然想博多份雙糧,好勒,咩時候放呢?咪等到有日插水警鐘響爆勒,咪拿拿林割少少禾青或者壯士斷臂囉。(唉,又點知會唔會賣左之後,隻輪又突然升到好似火箭咁啫。)

玩角子老虎機又好似買窩輪咁,唱左五百蚊散紙,諗住博五千。點知,中左一百幾十既時候無斬纜,一路玩一路輸仲諗住最尾果一蚊(定係五蚊?)會中 jackpot,最後,咪清袋囉。

不過人生就算好似玩窩輪咁又點,有咩輸唔起嘖!錢輸左咪搵過囉,何況,有d野根本唔會有輸贏,傢嘛。係咪先....

琴晚我同大大老闆講,話信心好弱,好似越老就越弱,有d擔心究竟我會唔會好似窩輪咁,捱到到期前果一刻輪價會俾時間損耗蠶食到變左零。邊庶先搵到我呢隻末日輪既正股?(定係根本無捷徑,應該買大藍籌?)

***************

記得好多政府想整頓治安,都會先招安班爛仔。因為爛仔先會知道爛仔既招數,以其人之道,還治其人之身。

雖然有好多金融衍生產品既人才被銀行界裁左出黎,但據消息透露,佢地有唔少都轉身 Head 住 Risk Management 同 Compliance。改邪歸正,定係順流逆流?

***************

(阿女,今日唔好玩咁多住,休息多d,飲多d水啦。)

16 comments:

C.M. said...

Chika兄,今次風格有冇少少似阿鎚?(白字應該仲少d)

C.M. said...

又。

有冇人知Elizza去左邊?

Anonymous said...

哈哈,好似寫作練習喎...

都係似CM多D.

(咁我呢期係咪似歌德或者CM咁呢... XD)

xiao zhu said...

http://iwearorangetoday.blogspot.com/

C.M. said...

Chika兄,唉,咁小弟又要惡補多陣。

歌德?唔會,你白字少咁多,又厚道咁多...

C.M.?都唔會,你靚仔過佢咁多,又有錢過佢咁多...


小珠:

人去樓空呀。

(唉,唔知幾時先可以聽到你把聲呢...?)

(幫你答:你隨時都得架喎。)

攰,閃。

said...

>應該買大藍籌?

一樣死。

總結,都係麥太嗰句,「佢細個唔___,最後,死左」

Marshmallow said...

阿女又唔舒服?

輪唔hold得耐架.小女子試過最短hold咗24分鐘咁大把...

C.M. said...

阿米爸:

咁... 點算好?積陰德得唔得?

綿綿:

嘩,24分鐘?果次應該好和味...

安諾勿斯 said...

係呀,學棉花姐話齋,玩輪要轉身快,個位到就入,入唔到就萛,密食當三番,勢色唔對就走,最忌坐貨,係咁輸時間值。

Anonymous said...

我靚仔過你? 我唔識答... 你問飲Baileys果個...

我有錢過你?你有成千萬喎 (一個細路五百萬,你有兩個楂手...)

你諗太多,於是篇文好多謎之聲,咁樣咪係CM風格 XD

Clay said...

大戶係鬼hedge,大戶同你對賭咋。大有大賭,細有細賭。

C.M. said...

安兄:
唉,小弟百無禁忌... 所以衰左。

Chika兄:
唔洗問,我咁醒,實啱。

千萬?點止,我仲要靠呢兩手以後以股代息,臨老過世。(謎?謎?謎?)

若虛兄:
哎呀,感激流涕。(若果你早d同我講,我就齋感激,唔洗流涕... 嗚嗚)

市場維京人 said...

好似第一次喺度留言。

> 誰不知有時(查實好多時)睇錯市,就逼住hold,一路 hold,個價就一路跌,覺得一日未放,一日都未算蝕。

唔止蝕好難玩個喎。建議如果係咁,你都係唔好玩窩輪咯。

止蝕,係任何投機者必要嘅另一手準備。

留得 cash 在,哪怕冇柴燒?

C.M. said...

維京兄:

歡迎歡迎。查實小弟偶然都會到貴鋪出沒,只是未有留下腳毛,請諒請諒。

止蝕呢傢野,真係要好似你咁了解市場動向先至理解同實現到。我覺得,好似我呢亭羊生,俾人挾一挾就怯到止蝕,嘿,個結果你都清楚,就係過兩分鐘就反彈都含含聲...

渣cash都係適合我呢亭理性+情緒都唔掂既小羊生。

市場維京人 said...

C.M.,

哈哈,我都多謝番你間唔中上嚟我個 blog 度先。

講到 hold cash,家下要開始留意喇。各國開始啟動印鈔機,未來幾年可能會有超級大通漲。小心小心。

C.M. said...

維京兄:
客氣客氣。

查實你講到超級大通漲,羊生已經企響度... 咁係咪個股市會升?(哈,淨係識咁樣問咋)