Monday, January 28, 2008

打中文字 (1?)

畢了業也渡過九七,速成、倉頡中文輸入法方興未艾,但因我暗於大理,所以只能學懂那皮毛中的毛 ~ 學鳥條毛。

天!這「日月金木水火土」跟我何干?那「尸廿山女田卜」又是幹啥的呢?很奇怪這套中文輸入法是基於一種什麼體系來建立的,倉頡的多元邏輯告訴我,我的腦袋應該是水泥做的。到現在,所有字根幾乎已經全部忘卻。剛才的日至土、尸至卜,還需從網上抄下來奉客。猶只記得「戈」是一「點」,可是,我應該按哪個鍵?

當年有位於外資跨國機構任職管理階層從事專業服務的朋友告訴我,學中文打字對你百害而無一利,因為學了,只代表你已經跟英語世界脫軌,勸我及早醒覺。(雖則如此理論早耳熟能詳,那為何你的英語還是地道如斯?)

既然你有你的道理,我有我的懶理,姑且來個順水推舟 ~ 來日方長,慢慢學啦。

(唔知點解,寫到呢度,竟然發覺越寫越唔開心既...?)

無辦法,醜婦終須見家翁,果年到國內開始事業新一章,先發覺原來唔識打中文字真係綁手綁腳。你知喇,好多時係國內要出咩通告、炒咩大鑊、玩咩金枝慾孽,都要拿拿淋快人一步,否則真係死左都唔知咩事。搞到果時我所有公文、電郵,全部要搵 d 妹妹仔代辦(仲可以因利乘便... ),好慘。

(咦?心情好似好番好多播,乜解救呢...?)

國內有套簡體字輸入法叫五筆,輸入方法同倉頡差唔多,都係按照筆劃黎打字。但我當時連簡體字點寫都仲學緊,你話點用筆劃打勒。但又好彩,之前係公司都讀過普通話初級班,所以都識少少拼音,於是咪頂住先,依拼音打住先囉。

睇番,點解以前細佬教我廣東輸入法時唔好好地學,反而臨老先黎學一樣完全未掌握得到既「外語」呢?最重要既原因當然係因為臨急抱佛腳逼住要應付工作啦,另外一個原因,大概係因為「一個標準」。

我認識既廣東輸入法,好似係「南極星」(NJStar)年代既產物。縱使我講左十幾廿年廣東話,都仍然唔明佢個 G 呀,J 呀,N 呀係咩時候先應該出現。況且,我 d 懶音多到呢 ~ 拼黎拼去都打唔到一個字。所以,唔該,咪再搞我。

講左咁耐,其實我今次寫呢,都係為果 d 同我一樣用拼音打字既人說項既。

有人話拼音打字學壞手勢,唔記得哂 d 字點寫、又會執筆忘字,甚至連咩叫中國傳統文化都會唔記得埋。(呵呵... 呢筆遲 d 再講。)

先想問下各位有邊個想寫一篇文(Blog post 又好,留言又好,電郵又好),然後準備打字入去果一刻,究竟係諗到個讀音先丫,定係諗到個字點寫先?

我呢,就係先諗到個音既。正如係咁咦一句 "I love Da Da" 一樣,就算打出黎既時候,心裏面都係先有聲而自有形,個音係個腦度浮現之後,隻手就自自然打堆字出黎。(好似 "Thank you for your email... " 咁,我點都唔會諗起個 "T" 字先過個 "Thank" 音囉。)

對於我呢類人,你話用拼音打字係咪自然不過先勒。

拿,你米話我讚自己,就係因為用普通話拼音打字熟左,所以都帶協我依家 d 普通話講到 lock lock 聲(似乎)。嘿,甚至試過好多次 d 國內同事話我有北方口音添(我估)。

(有關倉頡字,我好想問好耐,實情個「涼」字應該係兩點水定係三點水?)

24 comments:

Kenka said...

我用注音輸入法的, 腦中響的是國語, 所以近來執筆忘字的情況越來越嚴重.

Justin said...

我係倉頡既,通常都係腦裏面有個音,然之後隻手就識打個字出黎。


你打中文慢?咁你之前果一百篇長文係點出黎既?

Derek said...

倉頡都會令人執筆忘字架。

samsara said...

三點水呀CM哥哥,我係有音在個腦度跟住打出來先見到有唔妥既,我用倉頡呀,但係可能我依世人打中文字都唔可能可以好似我諗野咁快lu。英文我諗得慢d,所以係可以諗野同打字同步...如果唔計grammar錯晒既話。

仲有一個好site介紹:
http://humanum.arts.cuhk.edu.hk/Lexis/Canton2/

我成日唔識寫既字,都係打個同音字落去查返出來...

你下面果篇太長啦,容許我只講一樣:我唔鍾意office politics,因為佢counter productive,如果d人用玩野既時間同心機攞來做野,真係唔會ot囉。

Geoffrey Kong 江貴為 said...

我用九方,都仲要記住大概嘅字型,然後慢慢揀,所以唔記得點寫嘅字多數都可以慢慢搵番。
九方個software仲有多種其他輸入法,真係就嚟唔識寫字都識得打,總之識認字就得喇。

seikomatic said...

九方 x 2=慢+尚可>手機輸入法。

Geoffrey Kong 江貴為 said...

seikomatic:我懶學倉頡,又見D小學生用九方用得咁輕鬆先至用咋!

C.M. said...

Kenka:

你係第一個我所見打注音的人!厲害!

Justin:

我打中文真係好慢,用腦既話,大約1分鐘10字。所以「果一百篇文」大約用左半分鐘。

Derek:

咁你係咪都覺得執筆忘字未必因為用咩輸入法呢?

香妹:

咦?咁你打倉頡咪好快?

好多人一聽到office politics就擰哂頭,包括我。不過我認為... 未必counter-productive。

江兄:

聽講,九方應該係咁多種中文輸入法最快既。有機會(唔洗錢買software)我都想學。

精工:

你條方瞄拿,好深。(無理由你打九方會慢既)

C.M. said...

香妹:

可以答多我一個問題嘛?

我小學既時候,記得個「沖」字係兩點水個播,點解依家全部都係三點水?係咪我記錯?

xiao zhu said...

查商務詞典,兩點果個係「沖」嘅異體字。

C.M. said...

多謝!咁請問:「鈎」呢?定係「鉤」?

我依家好亂。

xiao zhu said...

「鉤」係「鈎」嘅異體字。

我其實真係冇乜心情,不過真係好唔抵得先至喺度答你。點解你唔自己查字典唧?

C.M. said...

小珠:

陰功囉。(你又陰功,我又陰功,雖然你仲陰功)

我陰功,因為... 我根本查唔到!又冇字典,上網又搵唔到。我淨係知道依家打個「鈎」字,成日比人話寫錯。又無人可以答倒我究竟個「鉤」字係咪正字。全部異體字都比倉頡“overwhelm” 哂,你知嘛?(用好多網上字典都話無呢個「鈎」字呀。)

你之所以陰功,咪因為我囉。鎖你。如果你得閑,有冇條link比我呀?(出年都等得)

xiao zhu said...

倉頡、速成都打到個「鈎」字,反而我用開果個拼音輸入就得呢個「鉤」,激死我喇。

我好古板架,不嬲都唔係好信得過網上字典,覺得唔夠正宗,我仲係鍾意揸住本字典慢慢揭。

唔駛鎖我喇,我唔知道你冇字典嘛。

Samsara said...

>>不過我認為... 未必counter-productive。

此話何說?

C.M. said...

珠:

講到咁明你都唔明(送字典比人呀!),哼!

香妹:

此話慢慢說。

Tommy said...

我用倉頡的

之前亦都用過廣東話輸入法﹐仲以為自己已經可以講得好快﹐點知到後來被逼要學倉頡個陣﹐就開闢左一個新的天地一樣﹐原來倉頡係打中文字速度之王呢個美譽真係無錯的!

我諗的時候通常都會係諗個音﹐但係唔係用個音來諗﹐係要用個音來叫醒個腦﹐係個 database 裡面搵到隻字個樣係點樣。最緊要係諗到個字係點樣寫﹐咁就可以拆到。

C.M. said...

Tommy:

有人話用九方先係速度之王喎... 可以一分鐘打成兩百字(好得人驚)。

先有音 > 腦 > 字... 嗯,多謝提點!

xiao zhu said...

>>講到咁明你都唔明(送字典比人呀!),哼!

買左喇,點俾你吖?

C.M. said...

嗯,見你咁好心地(嗚嗚,查實好感動),好啦,等我郵寄個回郵信封比你,你到時寄番比我喇。(請問本書幾重?)

xiao zhu said...

唔同你講笑呀,我真係有啲嬲架。

C.M. said...

唔好嬲喇。最多我送多你一樣:夏枯草。

Anonymous said...

>> 多謝!咁請問:「鈎」呢?定係「鉤」?
我係查緊呢樣野入左黎你呢度

http://humanum.arts.cuhk.edu.hk/Lexis/lexi-can/search.php?q=%B9_#
(按"中文字譜"可見"鈎"是異寫)

http://www.zdic.net/zd/zi/ZdicE9Zdic89ZdicA4.htm
http://www.zdic.net/zd/zi/ZdicE9Zdic92ZdicA9.htm
("鉤"字出現於康熙字典,說文解字亦謂"从金从句,句亦聲。";"鈎"乃"鉤"之簡體字?)

未查過 physical 既字典,亦唔知網上字典信唔信得過

C.M. said...

匿名君:

多謝賜教!

小弟就聽你refer 「說文解字」咁講,我諗我自小一直學既「鈎」字,應該未算最源遠流長勒。多謝曬!