人到X年冷吼匯豐

到左我咁既年紀，先至開始留意匯豐。

查實，我都唔係第一次接觸股票。唔提起，皆因輸到無謂提咁遮。

況且，呢輪無閑錢，只能夠數手指。

我唔係匯豐擁躉，所以就算有錢，都未必會考慮買。不過我都覺得，匯豐真係抵買，若果佢係$25既話。

之前口口聲同冰冰對賭買put輪，嗯，果刻真係想試下買入。Well，我生人唔生膽，梗係無買啦。（若果真係買左我應該可以執番少少）

不過，姑且寫返我呢排個想法，希望有高人可以指點迷津，等小弟下次可以落場證實下。

**********

當時對賭前，心目中既模擬策略係咁（重申，係模擬策略）：

買入中價匯豐熊，再響低位買入中期Call。若果升，隻Call輪就當買保險，若果正股跌（5%），先執隻熊仔，然後等反彈，搏唔洗比保險費。

**********

今日竟然大跌。（好。但隻call點算？）

所以先賣出一半熊仔，再留意往後一兩日，再大跌，賣埋佢。至於隻Call，等天收。

**********

停一停，用今日情況計，正股收市$46.25，ADR紐倫仲低過$44。後市若果....

(1) 唔上唔落。唉，似乎咁樣最閉翳。隻Bear bear唔知賣唔賣好，而隻call又返唔到身....

(2) 繼續跳水！當然最好（唔好打面！）。咁我就可以賣埋剩番既熊，然後再睇下跌幾多，再check RSI-14、暴力家通道、痕指手勢、路邊消息、大戶謊言、街市靚女話題... 如果天時地利人和，就反手買入遠期call，搏中短線反彈！

(3) 極速反彈！咁就先氹心口，痛哭點解唔賣曬隻熊（或開心到彈起醒目賣左半隻）。嗯... 應該唔會補淡倉，繼續睇市場反應。我心諗，如果返到同冰冰對賭開始個價位，應該可以賺少少。

**********

（再重申，呢個係模擬策略下既預計情況，並不構成如何投資或派對邀約）

主觀期望（斷估）未來走勢：三月初繼續尋底格局，至本星期壞消息消化之後，匯控會響$35-$45之間反覆，下星期至月中要視乎外圍走勢。估計港民由於需要籌集供股資金，相信托價資金不多，有利淡友繼續搶攻。以今日好淡雙方爭持情況，眾散戶分別於$47.0 及 $46.5 所築起血肉長城，據觀察，不消兩分鐘已經被沖散，似乎後市沽壓仍然沉重。未來股價於則有望於正式除權後回穩。眾散戶等待相關信號（利好、利淡、轉向任擇）。

（又，係咪買跌既人，出街比人點錯相既機會係咪會高d 呢？）

**********

仲有，我覺得「碎股」呢，完全唔應該係供唔供股，或係咪平生第一次買匯豐（我自己都有可能架）既考慮。

原因好簡單，買得匯豐既棒場客，都係一心諗住放長雙眼，等派息換股既遮。既然換返黎果d九成九係碎股，又點會介意係都要買入3手既倍數話怕有碎股嘖。係咪先？

**********

有冇高手師兄師姐可以指點下小弟此策略如何？

**********

（又，有冇老闆請八卦財經寫手？）

**********

其他少年、青年、X年一齊講匯豐：

今估匯|養男人？|無所謂？|供唔供？|訪問|暫且告別|劈腿心態