My Arrogance and My Wishes of the Year

我認我係高傲自大~ （呢度每個 post 既字裏行間都睇得一清二楚啦，今次仲大大隻寫埋添！）

不過，我「更」高傲自大既一面，其實並未係呢度顯示出黎。雖然我知道你地有d人都好醒睇得出，又好心唔踢爆我（除左嫌自己條頸未夠多結仲哂自己桃花命果隻，同埋就快比人活檢果件），但我真係一直都將呢塊黑暗面好小心咁隱藏住。

但因為紙始終包唔住火，所以我呢批更高傲自大既珍藏，被逼留左比身邊人。

「喂，我今日咁咁咁播，你話係咪好勁呢，呵呵呵......！」

「呢，你都應該記得我咁咁咁喇，哈哈哈......！」

「嗱，阿邊個朝早讚過我咁咁咁喎，桀桀桀......！」

哼！不過，每次都換來極之沒趣既反應：有時 play deaf，有時扮啞，有時譏諷奚落，有時拳打腳踢，有時插眼 cool 頸...... 總之一切都係自己攞黎 （點解以前唔係咁既？）。我諗，若果依家將呢d 自命不凡既事跡講比豬朋狗友聽，估計個收場應該會正面d，鼓勵性高d... 甚至搖旗呐喊都米話冇可能！嘿，偏偏最親近你果個，就唔係咁睇，佢偏偏要打擊你自信，摧毀你既弱小心靈... 。（講左咁多，真係聽者傷心，聞者流淚... ）

但又唔知呢d係咪叫求仁得仁定係叫「犯X」，將自己既豐高偉績講比身邊既人聽，其實幾 high，姑勿論講左之後得到咩 hangover 或者重創，總之搞到依家欲罷不能，經常留番d藉口比佢虐待我，呵呵呵，come on，baby...

我覺得人將自己既威水史公之於世係理所當然既。不過，為左安慰我自己只講比身邊人聽呢個奇怪既癖好，我會諗：蝦，係咪你鍾意邊果個人，就會不其然將自己d 無聊青史講比果個人聽呢？

好似我咁，係咪代表我d朋友貴精不貴多呢？而又好似果d 公公婆婆將自己既威水史講比三唔識七既人聽，又係咪代表佢地好寂寞呢？人地成日同我講威水史，又係咪代表佢好關心我呢（嘿！）？

我諗我今年第一個願望，嘿！就係希望對於呢兩個問題搵到d線索。（講咁長篇，自己都覺得有d無聊。）

上年年尾同自己搞左個小雪崩... 效果尚算滿意。第二個願望，就係可以整理一下小雪崩既運用。嘿！希望唔洗自己再親自試藥，做 human testing 喇，嗚...

另外呢，今日收到一生人第一份新年禮物（新曆新年 + 實物禮物），嗯，真係好開心。雖則我唔算感性，對於禮物，我多數會感謝多過感動。不過今次呢份禮物，當中對我個人既意義，足以令我個「感性 Treasure Chest」 豐富左好多好多，好感動。希望送呢份禮物比我既呢位朋友，能夠感受到我果份內心既回響。所以我第三個願望，就係希望以後自己送禮既時候，都可以超越感謝。（嘿！你會送禮？！嘿！嘿嘿嘿！）

Well，係呢度先送份禮比大家： 祝大家新年快樂，身體健康！（哈，感動咧~ ）