Thursday, August 07, 2008

寶物

唔知係咪公司打風果日冇拴窗,一返到公司,就發現檯面竟然有四隻雀仔。一隻係小白鷺,一隻係叉尾太陽鳥,另外仲有一對琵琶鴨。唔知佢地係幾時飛入黎既呢?

嗯,經過我細心研究,除左知道呢四隻可愛既小動物究竟英文名係乜之外,仲知道原來佢地係由太平洋飛黎。咁長途跋涉,真係辛苦曬。(明明落大雨,點解個身仲乾錚錚既?)

再睇真d,咿?果幾隻小可愛仲一齊拎住個趣緻天鵝絨布袋個播,真係十足十d帶子鶴,送仔兼擔挑。

陰功,果兩隻琵琶鴨條尾既羽毛原來比膠水黐左落個布袋度,一搣呢,條靚靚羽毛就散曬,嗚嗚,唔可以循環再做鴨毛掃。唉,仲有,唔知係咪因為個窗臺烏糟,所以果幾隻小可愛個身都有d烏卒卒,點都抹唔甩,浪費曬佢地短少但精彩既生命,真係好可惜。

好小心用咁打開個天鵝絨布袋,原來裏面仲有個絲絨布袋!拆開個絲絨袋(米住,仲有冇袋中袋!?),終於發現裏面有冊本草綱目同埋一個綉花錦盒。

本本草綱目好似有d「披口」,嘿,你呢幾隻雀真係照顧不周,打風遮,都就住丫嘛。算啦,「本野」咁厚,躉埋一邊,拆左個錦盒先。(米鬧住,乜你未聽過,書情若是久長時,又豈在朝朝暮暮?)

嘿,不出所料,個錦盒入面真係又有個真皮袋,仲兩層添!GOD!(係咪有人知道我有儲袋癖呢?)

拉開袋口繩,一隻綠色既貓頭鷹飛左出黎,可能因為太肥,所以隻貓頭鷹飛左冇耐就降落響張檯到。嗯,真係好肥,但真係好可愛。唔似乾錚錚果四隻,呢隻雀,光滑得黎晶瑩剔透,奇雀奇雀。(睇多兩眼,個樣幾似「一索」,雖然靚好多)

既然班乾錚錚係都要搲住個天鵝絨布袋(係咪叫一台花?),剩低阿索一丁友,好,就同阿索起個巢先喇。不過見今日時間緊迫,都係暫時放響暖爐上面,費事佢凍親,遲d先度下個巢點整。

略有所思。阿索點會無緣無故呢埋係個袋裏面呢?而且,點解無啦啦有陣除呢?

本草綱目!

查實咁,原本真係想暫時丟低呢個枕頭一陣,不過,呢陣除實在好攻鼻,於是打開本草綱目裝裝,誰不知發現...

唉,原來入面仲有張...... 藏寶圖!

張藏寶圖寫住話,果d披口呢,係明清時代遺漏落黎架喎,同班乾錚錚無關喎,又話唔關肥嘟嘟事... (邊個係肥嘟嘟?阿索?)

哼(怒睥四雀),你幾隻野今日就放過你地。下次,嘿,嘿嘿。

既然依家洛陽紙貴,我諗我要好好珍藏呢份藏寶圖同埋本草綱目至得。嗯,鎖入夾萬定係埋落地底穩陣d呢?

14 comments:

Morca said...

此地無銀...

Anonymous said...

>>個樣幾似「一索」,雖然靚好多

咁咪即係「好索」囉。

K said...

成個故仔都唔合邏輯o既!

>>中文名都未諗掂,咁快黎英文名?
唔得咩?

C.M. said...

Morca:

咁寶物梗係要收收埋埋架喇。

小黃蓉:

雖然係遮,但我又覺得佢好似成日監視住我咁。

Karen:

唔合邏輯?係咩?唔覺播又... (英文名嘛,得得得,但我搞唔掂囉)

安諾勿斯 said...

大佬,唔明呀!

Anonymous said...

大大佬, 我都唔明呀!

Anonymous said...

>>但我又覺得佢好似成日監視住我咁。

唓,咁就易啦,仲駛乜對佢咁好擺喺暖爐上面唧,求其擺,凍鬼死佢囉。又或者係咁倚塞佢落櫃桶底冇眼睇都得格。

Anonymous said...

喂!你比小豬傳染左呀?

xiao zhu said...

Peter:

>>你比小豬傳染左呀?

你講緊我呀? 係唔係呀? 你識得我架? 請問閣下邊位呀? 定係我表錯情呢? 不過係唔係話我都好喇,其實我想講呢,C.M. 先至係帶菌者呀,我係俾佢傳染架陰功!!

C.M. said...

安兄:

冇奶油!

三姑...妹:

唔係化,連你都係咁?

小黃蓉:

咦?似乎你好似明播。咁講多樣野你聽,可能因為個跋,所以嗱嗱林就出現本草綱目。

暖爐始終唔係長治久安之計,應該送個巢比佢。最好係一個密封既巢。

Peter:

係呀係呀!小珠佢有病呀!

小珠:

我呢亭叫「感染」,唔係「傳染」!你呢~ (Peter,你睇!拿,人性大畢露呀)

Anonymous said...

係吖!
我咪係"又會打死captain cook令佢一仆兼一碌"嗰個成日陪你癲嘅人囉!

xiao zhu said...

P。E。T。E。R!嘿,嘿嘿!

C.M.:

係吖,我有病,仲病得好重添呀。都係你囉!

能夠令我喺你面前人性大畢露,你萬幸(恨)喇!!

Anonymous said...

個跋同本草綱目,真係好合邏輯咁喎!

送個密封嘅巢? 你好憎佢咩? 想焗死佢呀?

C.M. said...

小珠:

好呀好呀。你記住呢個P.E.T.E.R啦!唔好掛住我。(拿,斯文人呀大家...)

小黃蓉:

梗係合邏輯喇!我d咩聯想力呀你話!

(咁之前有人話塞佢落櫃桶底丫嘛,我咪好心比個暖巢比佢囉,我都係順應民意遮...)